*സപ്ലൈ ചെയിന് ആന്റ് ലോജിസ്റ്റിക്സ് സ്റ്റാര്ട്ടപ്പുകള്ക്ക് അവസരവുമായി കേരള സ്റ്റാര്ട്ടപ്പ് മിഷന്
- Posted on August 25, 2025
- News
- By Goutham prakash
- 121 Views
സ്റ്റാര്ട്ടപ്പ് മിഡില് ഈസ്റ്റുമായി ചേര്ന്ന് ഇന്ഡസ്ട്രി കൊഹോര്ട്ട് പ്രോഗ്രാം
സംഘടിപ്പിക്കും*
സി.ഡി. സുനീഷ്.
തിരുവനന്തപുരം: ഇന്ത്യയിലെ മികച്ച സപ്ലൈ ചെയിന് ആന്റ് ലോജിസ്റ്റിക്സ് മേഖലയിലെ സ്റ്റാര്ട്ടപ്പുകള്ക്ക് മിഡില് ഈസ്റ്റിലെ സ്റ്റാര്ട്ടപ്പ് ആവാസവ്യവസ്ഥയുടെ ഭാഗമാകാന് കേരള സ്റ്റാര്ട്ടപ്പ് മിഷന് (കെഎസ് യുഎം) അവസരമൊരുക്കുന്നു. കെഎസ് യുഎമ്മും സ്റ്റാര്ട്ടപ്പ് മിഡില് ഈസ്റ്റും ട്രാന്സ്വേള്ഡ് ഗ്രൂപ്പും സംയുക്തമായി സംഘടിപ്പിക്കുന്ന ഇന്ഡസ്ട്രി കോഹോര്ട്ട് പ്രോഗ്രാമിലൂടെയാണ് ഇത് സാധ്യമാകുക.
പ്രമുഖ കോര്പ്പറേറ്റ് സ്പോണ്സര്മാരുടെ പിന്തുണയോടെയാണ് ഇന്ഡസ്ട്രി കോഹോര്ട്ട് പ്രോഗ്രാം സംഘടിപ്പിക്കുന്നത്. പ്രാദേശികമായി വളര്ച്ചാ-വിപണി സാധ്യതകളുള്ള തിരഞ്ഞെടുക്കപ്പെടുന്ന പത്ത് സ്റ്റാര്ട്ടപ്പുകള്ക്ക് ഇന്ഡസ്ട്രിയല് കൊഹോര്ട്ടിന്റെ ഭാഗമാകാനാകും.
ഇന്ത്യന് സ്റ്റാര്ട്ടപ്പുകള്ക്ക് മിഡില് ഈസ്റ്റ് മേഖലയിലെ നിക്ഷേപ സാധ്യതകള്, ബിസിനസ് അവസരങ്ങള്, പങ്കാളിത്തങ്ങള് എന്നിവയിലേക്ക് എത്തിച്ചേരാന് ഇന്ഡസ്ട്രി കോഹോര്ട്ട് പ്രോഗ്രാം സഹായകമാകും. സ്റ്റാര്ട്ടപ്പുകള്ക്ക് വ്യവസായ പ്രമുഖര്-ആഗോള സ്റ്റാര്ട്ടപ്പ് ആവാസവ്യവസ്ഥയിലെ വിദഗ്ധര് എന്നിവരില് നിന്നുള്ള മെന്റര്ഷിപ്പ്, യുഎഇ- മിഡില് ഈസ്റ്റ് വിപണികളിലേക്കുള്ള പ്രവേശനം, നിക്ഷേപക ബന്ധങ്ങള്, ബിസിനസ് വികസന പിന്തുണ, പിച്ച് അവസരങ്ങള്, കോര്പ്പറേറ്റ് സഹകരണ അവസരങ്ങള് തുടങ്ങിയവും ഇതിലൂടെ ലഭ്യമാകും.
ഡിജിറ്റല് ചരക്ക് പ്ലാറ്റ് ഫോമുകളില് തുടങ്ങി എഐ/എംഎല് അധിഷ്ഠിത സപ്ലൈ ചെയിന് ദൃശ്യപരത മുതല് കോള്ഡ് ചെയിന് കാര്യക്ഷമത, പോര്ട്ട്, യാര്ഡ് ഡിജിറ്റൈസേഷന്, ക്രോസ്-ബോര്ഡര് കംപ്ലയന്സ് ഓട്ടോമേഷന് വരെയുള്ള മേഖലകളിലാണ് ഇന്ഡസ്ട്രിയല് കൊഹോര്ട്ട് ശ്രദ്ധ കേന്ദ്രീകരിക്കുന്നത്.
വിവരങ്ങള്ക്ക് https://business.startupmission.in/industry_cohort സന്ദര്ശിക്കുക.
