ഇന്ന് ദേശീയ ഡോക്ടേഴ്സ് ദിനം : ഡോക്ടർമാർക്കായി ഒരുദിനം

'ഹീലിംഗ് ഹാൻഡ്‌സ്,കെയറിങ് ഹാർട്ട്സ് ( സുഖമേകുന്ന കരങ്ങൾ,കരുതലുള്ള ഹൃദയങ്ങൾ)'എന്നതാണ് 2024 ലെ ഡോക്ടേഴ്സ് ദിന പ്രമേയം

അർപ്പണ.എസ് പ്രസാദ്

ജൂലൈ 1... ദേശീയ ഡോക്ടേഴ്‌സ് ദിനം... 1991 മുതലാണ് ഡോക്ടേഴ്‌സ് ദിനം ആചരിച്ച് വരുന്നത്. ഏത് പ്രതികൂല സാഹചര്യത്തിലും തങ്ങളുടെ കടമകൾ നിറവേറ്റുകയും ,രോഗികൾക്ക് മികച്ചതും നിസ്വാർഥവുമായ സേവനം നൽകുകയും ചെയ്യുന്നവരാണ് ഡോക്ടർമാർ. കൊറോണ കാലത്ത് സ്വന്തം ജീവൻ ത്യജിച്ചും കുടുംബത്തെ അകറ്റി നിർത്തിയും നിസ്വാർത്ഥം പ്രവർത്തിച്ച ഒട്ടേറെ ഡോക്ടർമാരെ നമുക്കറിയാം.  അവരെ ഓരോരുത്തരേയും ആദരിക്കാൻ കൂടിയുള്ള ദിനമാണ് ഇന്ന്. ജനങ്ങൾക്ക് മികച്ച ചികിത്സ ലഭ്യമാക്കാൻ അഹോരാത്രം പ്രവർത്തിച്ച ഡോ. ബി.സി റോയിയുടെ സ്മരണാർത്ഥമാണ് എല്ലാവർഷവും ജൂലൈ ഒന്നിന് രാജ്യത്ത് ഡോക്ടേഴ്‌സ് ഡേ ആചരിക്കുന്നത്.

ചരിത്രം

പശ്ചിമബംഗാളിന്റെ രണ്ടാമത്തെ മുഖ്യമന്ത്രിയും ഡോക്ടറുമായിരുന്ന ബിദൻ ചന്ദ്ര റോയിയുടെ ഓർമ്മയ്ക്കായാണ് ജൂലൈ 1 ഡോക്ടേഴ്‌സ് ദിനമായി ആചരിക്കുന്നത്. അദ്ദേഹത്തിന്റെ ജന്മദിനവും ചരമദിനവും ഇതേ ദിവസമാണ്. 1991 ൽ കേന്ദ്രസർക്കാർ ജൂലൈ ഒന്നിന് ഡോക്ടേഴ്‌സ് ദിനമായി ആചരിക്കാൻ ആഹ്വാനം ചെയ്യുകയായിരുന്നു. 1882 ജൂലൈ ഒന്നിനാണ് ബിദൻ ചന്ദ്ര റോയി ജനിക്കുന്നത്. അദ്ദേഹം മരിക്കുന്നത് 1962 ജൂലൈ ഒന്നിനുമാണ്.  

ഇന്ത്യയിലെ പരമോന്നത സിവിലിയൻ ബഹുമതിയായ ഭാരതരത്ന പുരസ്‌കാരം 1961 ൽ അദ്ദേഹത്തിന് നൽകി ആദരിച്ചു. പ്രശസ്തനായ ഒരു സ്വാതന്ത്ര്യ സമര സേനാനി കൂടിയായിരുന്നു ബിസി റോയി. 1948 മുതൽ അദ്ദേഹം മരിക്കുന്നത് വരെ 14 വർഷം പശ്ചിമബംഗാളിന്റെ മുഖ്യമന്ത്രിയായിരുന്നു അദ്ദേഹം. സ്വന്തം ജീവൻ പോലും അവഗണിച്ച് രോഗികളെ നോക്കുന്നതിൽ ഉത്തമ ഉദാഹരണമായിരുന്നു ഡോ. റോയി. 

ഡോക്ടേഴ്സ് ഡേയുടെ പ്രാധാന്യം

ഓരോ ജീവന്റേയും ക്ഷേമം ഉറപ്പാക്കാൻ ഡോക്ടർമാർ രാവും പകലും വിശ്രമമില്ലാതെ പ്രയത്‌നിക്കുകയാണ്. അതിനാൽ തന്നെ ഡോക്ടർമാരെയും അവരുടെ പ്രവർത്തനങ്ങളെയും ആദരിക്കേണ്ടത് വളരെ പ്രധാനമാണ്. ഒരു ഡോക്ടറുടെ പ്രവൃത്തിയെ അംഗീകരിക്കാനും അവരോട് ശരിയായി നന്ദി പറയാനും ഉപയോഗിക്കേണ്ട ദിവസം കൂടിയാണിന്ന്. അതേസമയം, വിവിധ രാജ്യങ്ങൾ വ്യത്യസ്ത തീയതികളിലാണ് ഡോക്ടഴ്‌സ് ദിനം ആഘോഷിക്കുന്നത്. ഇന്ത്യയിൽ ഡോക്ടേഴ്സ് ദിനം ജൂലൈ 1 ന് ആഘോഷിക്കുന്നു, അമേരിക്കയിൽ മാർച്ച് 30നാണ് ഡോക്ടേഴ്‌സ് ദിനം. ക്യൂബയിൽ ഡോക്ടർമാരെ ആദരിക്കുന്നത് ഡിസംബർ 31നാണ്. ഓഗസ്റ്റ് 23നാണ് ഇറാനിലെ ഡോക്ടേഴ്‌സ് ദിനം. ആദ്യമായി ഡോക്ടേഴ്‌സ് ദിനം ആചരിക്കുന്നത് 1993ൽ അമേരിക്കയിലെ ജോർജിയയിലാണ്.

ഇന്നത്തെ ലോകത്ത് ആരോഗ്യ സംരക്ഷണത്തിന് ഡോക്ടർമാരുടെ ,വിശിഷ്യാ കുടുംബഡോക്ടർമാരുടെ പങ്ക് അത്യന്താപേക്ഷിതവും അനിവാര്യവുമാണ്. കൊവിഡിനുശേഷം ലോകമെമ്പാടും നിരവധി ആരോഗ്യ പ്രതിസന്ധികൾ ഉയരുന്നുണ്ട്. നിർമാർജ്ജനം ചെയ്ത പല അസുഖങ്ങളും തിരിച്ചു വരുന്നതും ,ആയുർദൈർഘ്യവർധന മൂലമുള്ള രോഗങ്ങളും , ജീവിതശൈലീ രോഗവർധനയും ഭാരതം പോലെ ഒരു രാജ്യത്തു ഡോക്ടർമാരുടെ ജോലി കൂടുതൽ ദുഷ്‌കരവും നിർണായകവുമാക്കുന്നു.

2024 ലെ ഡോക്ടേഴ്സ് ദിന പ്രമേയം

'ഹീലിംഗ് ഹാൻഡ്‌സ്,കെയറിങ് ഹാർട്ട്സ് ( സുഖമേകുന്ന കരങ്ങൾ,കരുതലുള്ള ഹൃദയങ്ങൾ)'എന്നതാണ് 2024 ലെ ഡോക്ടേഴ്സ് ദിന പ്രമേയം. 

രോഗിയുമായുള്ള ദൈനംദിന ഇടപെടലുകളിലൂടെ ഒരു ഡോക്ടർ ആർജിച്ചെടുക്കുന്ന ക്ഷമയും സഹാനുഭൂതിയും സൂചിപ്പിക്കുന്ന ഈ പ്രമേയം രോഗിക്ക് ഡോക്ടർ നൽകുന്ന പരിചരണത്തെയും വൈകാരികമായ പിന്തുണയെയും ഊന്നിപ്പറയുന്നു.